عطرك يعرفك
سياسة الخصوصية
بياناتك إلك، ونجمع بس اللي نحتاجه حتى نوصّلك عطرك.
آخر تحديث: تشرين الأول ٢٠٢٦
شنو نحفظ بجهازك
نتيجة اختبار الذوق، وعربتك، ونقاط تحدّي الأنف إذا تلعب كزائر، ونسخة من العطور حتى التطبيق ينفتح بدون إنترنت. هذي كلها تبقى بموبايلك وتنمسح إذا مسحت التطبيق.
شنو نحفظ عدنا إذا سوّيت حساب
اسمك وإيميلك ورقم موبايلك، وطلباتك، والعطور اللي طلبت ننبّهك أول ما ترجع («أعلمني عند التوفر» — ينمسح الطلب أول ما نبلّغك)، ورصيد نقاط تحدّي الأنف وعدد جولاتك، وكودات الخصم اللي حوّلتها من نقاطك ووقت التحويل (حتى يبقى مرة وحدة بالأسبوع). التطبيق يشتغل كامل بدون حساب — الحساب يلزم بس للطلب.
الدخول بحساب كوكل أو حساب آبل
إذا دخلت بضغطة وحدة، كوكل أو آبل يعطونا إيميلك واسمك بس — ولا شي غيرهم. ما نشوف كلمة سرّك عندهم، وما نوصل لجهات اتصالك ولا صورك ولا بريدك ولا أي شي بحسابك. وإذا اخترت «إخفاء إيميلي» من آبل، يوصلنا إيميل مستعار منهم وهو يكفينا. وما نرسل إلهم ولا معلومة عن طلباتك أو ذوقك.
الطلبات
لما تطلب نحفظ اسمك وموبايلك وعنوانك وملاحظتك وسعر الطلب. نستعملها حتى نتصل بيك نأكد الطلب ونوصّله، وما يشوفها غير مدير متجر نوتات.
المحادثة ويّا فريق نوتات
لما تراسلنا من «تواصل ويانا» نحفظ رسائلك والصور اللي تدزها والعطر اللي تسأل عنه، مربوطة بحسابك حتى نرد عليك. ما يشوفها غير مدير متجر نوتات، والصور بمخزن خاص ما ينفتح بدون إذن. وإذا راسلتنا واتساب، الرسالة تمر بواتساب حسب سياستهم.
المستشار العطري
لما تسأل المستشار، سؤالك وآخر رسائل المحادثة وذوقك العطري وميزانيتك تنرسل لخدمة Gemini من شركة Google حتى تكتب الرد — بدون اسمك أو إيميلك أو موبايلك. وعدنا نحسب عدد أسئلتك باليوم بس، حتى نحدّد سقف الأسئلة.
الإشعارات
إذا سمحت بالإشعارات نحفظ رمز جهازك مربوط بحسابك، ونرسل عن طريق Firebase من شركة Google تنبيهات طلباتك وردود الفريق والعطور اللي طلبت ترجع، وأحياناً إشعار من فريق نوتات لكل الزبائن (عطر جديد أو خبر من المتجر). الإشعارات تبقى بشاشة «الإشعارات» بحسابك، وتكدر تطفّيها من «حسابي» بأي وقت.
شنو ما نجمع
ما نطلب معلومات دفع — الدفع عند الاستلام. ما نتتبّع موقعك، وماكو إعلانات، وما نبيع ولا نشارك بياناتك ويا أي أحد.
الكاميرا والصور
إذن الكاميرا والاستوديو ينطلب بس لما تختار تدز صورة بالمحادثة ويّا الفريق، وبوضع الموظف حتى فريق نوتات يصوّر قناني العطور. ما نوصل لصورك غير اللي تختارها بنفسك. صور القناني اللي يصوّرها الفريق ممكن تنرسل لخدمة Gemini من شركة Google حتى تتعبّى بيانات العطر وتطلع صورة ستوديو للمتجر — صورك إنت بالمحادثة ما تنرسل لها أبداً.
وين تنحفظ البيانات
على خادم نوتات، والاتصال بيه مشفّر. كلمة السر ما نشوفها — تنحفظ مشفّرة.
مسح بياناتك
تكدر تمسح حسابك بنفسك من أسفل «حسابي» ← «امسح حسابي»، بعد ما تأكّد إنك إنت: كلمة السر إذا حسابك بالإيميل، أو نافذة كوكل أو آبل إذا دخلت بضغطة وحدة. ينمسح إيميلك واسمك وموبايلك ومحادثتك ويّا الفريق وصورها ونقاطك وكوداتك من عدنا نهائياً. الطلب اللي بعده ما انرسل ينلغي، وطلباتك القديمة تبقى للحسابات بس بدون اسمك وموبايلك وعنوانك وملاحظتك. وإذا عندك طلب انرسل هالأيام، استنى يوصلك وبعدها امسح. بياناتك اللي بجهازك (الذوق والنقاط) تبقى لحد ما تمسح التطبيق.